Bo mester:
- Un weya/ baki pa cushina e carni porco
- Cuchara pa mescla e ingredientenen y e carni porco
- Foil pa tapa e carni di porco ora e bay den forno
Ingredientenan:
- Carni porco ( 1 kilo/ slices na e cantidad cu abo kier)
- Dos pa tres cuchara di sucu (por sucu bruin tambe)
- 1 cuchara di season all (bo por agrega mas na e cantidad cu bo ta season bo carni)
- 1 cuchara di vijf spijs poeder
- 1 cuchara di sesame oil
- 1 cuchara di soy sauce
- 1 cuchara di hoisin sauce
- ½ cuchara di char siu marinade
- ½ cuchara di ketjap manis
- 3 tenchi di konoflok mula
- 1 kopi di Roast red Pork seasoning mix
- 1 cuchara di laos poeder
Stapnan:
Prome cu tur cos percura bo tin tur bo material bo dilanti pa por cuminsa prepara bo carni porco.
- Prome cos cu bo ta bay haci ta slice e bara di carni cu bo tin den repi (no mucho fini y tampoco diki). Si e tin vet, no kit’e pasobra esaki ta dun’e extra sabor. (Si acaso bo no tin bara di carni porco, bo por uza e slicenan cu ta bin cla caba)
- Combina tur e sazob cu otro y incorpora esaki den e carni. Percura pa bo duna e carni di porco un massage cu tur e sazon cu bo a pone pa asina e carni porco por coy un mihor smaak. Despues laga e carni di porco marina den frishider pa por cushin’e e siguiente dia of mas despues den e dia.
- Ora bo caba di haci esaki bo tin 2 opcion pa cushin’e. Sea ta den weya riba stof of den forno.
Forno
- Pone e carni porco den un baki cu bo por hinca den forno.
- Percura pa bo forno ta bon cayente na 225 graden Celsius (450 F). Ora e forno ta bon cayente, bo ta bay pone un pida foil riba e baki di carni porco pa asina e no kima pero cushina bon paden, y hinc’e den forno.
- Corda tira bista riba e carni porco cada 10 minuut te ora bo haya e holor dushi den cushina. Unabes bo haya e holor bo ta bay kita e foil for di dje y lag’e cushina door di baha e temperatura pa 200 graden Celsius (400 F) y keda bolter e pa cada banda por cushina igual.
- Pa bo wak si el a cushina bon paden, bo ta bay corta un pida na banda pa wak si e ta bon cushina. Y cla bo ta pa saboria e dushi Christmas Char Siu Pork!
Weya riba stof
- Sende bo stof y pone bo weya riba dje. Ora bo mira cu weya ta bon cayente bo ta pone un bara di manteca den e weya y laga e manteca dirti.
- Unabes e manteca a dirti, bo ta pone e carni porco aden y basha un poco awa den e baki cu bo a tempera e carni porco pa asina bo bash’e den e weya.
- Cu esaki bo ta bay tapa e weya y lag’e cushina. Percura pa keda bolter e carni pa cada banda e por cushina pareu.
- Ora bo wak cu e carni ta mustra ta bon cushina, bo ta bay paga e stof y bo ta cla pa come cu mil amor!
